१४ भदौ ,  निजगढ |  बाराको निजगढमा एक महिलाको शव फेला परेको छ ।  चुरे भएर बग्ने धन्सार खोलाले बगाउँदा करीब ४२ वर्षीया महिलाको ज्यान गएको छ ।

धन्सार खोलाले बगाएर मृत्यु हुनेमा मकवानपुर फापरबारीस्थित वाग्मती गाउँपालिका– ८ शान्तिपुर टोलकी कमला परियार रहेको इलाका प्रहरी कार्यालय निजगढले जनाएको छ । हाल जीतपुरसिमरा उपमहा नगरपालिका–६ सुकुमबासी टोलमा बस्दै आइरहेकी परियार मकवानपुर फापरबारीस्थित वाग्मती गाउँपालिका शान्तिपुरमा रहेका पति सीताराम विकलाई भेट्न जाने क्रममा धन्सार खोलाले बगाएको निजगढ प्रहरीको भनाइ छ ।

शवको शल्यपरीक्षणपछि आफन्तले बुझेर दाहसंस्कारका लागि ल्याउन लागेको बुझिएको छ । बगाएर ल्याएको शव निजगढ नपा–१ स्थित खोला किनारमा भेटिएको प्रहरीले जानकारी दिएको छ ।