बिपिन अधिकारी , १५ असोज  |  निजगढ नगरपालिका वडा नम्बर ७ स्थित सगरमाथा बचत तथा ऋण सहकारी संस्थाको भोलि हुने २२ औं बार्षिक साधारण सभाको तयारी पूरा भएको छ ।

संस्थाका अध्यक्ष भोलाप्रसाद गौतमले हिजो पत्रकार भेटघाट कार्यक्रमको आयोजाना गरेर साधारण सभाको तयारी पुरा भएको जानकारी दिनुभएको हो । पत्रकार सम्मेलमा अध्यक्ष गौतमले संस्थाले निशुल्क स्वास्थ्य शिवीर, रक्तदान, नगर स्तरीय सरसफाइ तथा वातावरण संरक्षण जस्ता कार्यहरु आयोजना गरेको जानकारी दिनुभयो ।

त्यसैगरी अग्नि, बाढी, भुकम्प, हावाहुरी जस्ता प्रकृतिक प्रकोप पीडितलाई वित्तिय तथा गैरवित्तिय सहयोग उपलब्ध गराउनुको साथै सगरमाथा छात्र वृत्ति अक्षयकोषबाट गरिब तथा जेहेन्दार विद्यार्थीलाई छात्रवृत्ति वितरण, निजगढ नगरपालिका वडा नम्बर ७ स्थित सक्तेश्वर शिवशक्ति आधारभूत विद्यालयका ५० जना विद्यार्थीलाई न्यानो कपडा (ट्रयाकसुट) वितरण तथा निजगढ दुबई छात्रबृत्ति कोष र गौरीशंकर छात्र वृत्ति कोषबाट ५-५  हजारको छात्र वृत्ति प्रदान गरिनुको साथै सार्वजनिक स्थलमा खानेपानी ट्यांकी निर्माण, जेष्ठ नागरिक तिर्थाटन सम्मान तथा पुरस्कार वितरण, विद्यालयहरुमा सहकारी कार्यक्रम संचालन लगायतका सामाजिक कार्यहरु गरेको अध्यक्ष गौतमले बताउनुयो ।

२०५७ साल दर्ता भइ २७ जना शेयर सदस्यहरुको कुल शेयर पूँजी ११ हजारबाट सुरु गरिएको सगरमाथा सहकारीमा अहिले १ हजार ४ सय १५ जना शेयर सदस्यहरुको १ करोड १९ लाख ८६ हजार ५ सय शेयर पूँजी र कुल कारोबार ८ करोड ९ लाख ३३ हजार ३ सय ४८ रुपैया रहेको अध्यक्ष गौतमले जानकारी दिनुभयो ।

कार्यक्रममा पत्रकार गोकुल घोरसाइने, जितलाल श्रेष्ठ, लक्ष्मी पाण्डे, प्रलाद तिमल्सिना, प्रभातकुमार तिमल्सिना र प्रकाश श्रेष्ठ लगायतको उपस्थित गरेको थियो । सो कार्यक्रममा संस्थाकी उपाध्यक्ष रमा मैनाली, कोषाध्यक्ष बच्चुराम लामिछाने, सदस्यहरु प्रह्लाद रिमाल, हरिमाया पोखरेल, सीता रिसाल र व्यवस्थापक सूर्यप्रसाद तिमल्सिना लगायतको उपस्थिति रहेको थियो ।

कार्यक्रम संस्थाका सचिव वोधनाथ चौलागाईले संचालन गर्नुभएको थियो । पत्रकार भेटघाट कार्यक्रम सगरमाथा सहकारीको आफ्नै साभहलमा भएको थियो ।