वागमती यूवाक्लब विरुद्ध ३–० को सहज जित निकाल्दै बिरगंज यूनाईटेड क्लब सिमरामा जारी जगदम्बा १३ र्औं जीतपुरसिमरा गोल्डकपको क्वाटर फाइनलमा प्रवेश गरेको छ ।

बिरगंजको जीतमा विवेक चौधरीले दुई तथा कृपा चौधरीले एक गोल गरे । पहिलो हाफ बराबरी खेलेको बागमती विरुद्ध दोश्रो हाफमा वीरगञ्ज हावी भयो । बागमती विरुद्ध खेलको ५४ औं मिनेंटमा विवेक चौधरीले अग्रता लिए । वागमतीका गोल रक्षक रविन बस्नेतको गल्तीको फाइदा उठाउँदै वीरगञ्जका विवेक चौधरीले खाता खोले । डि–बक्स् एरिया छाडेर अघि बढेका गोल रक्षकलाई विट गर्दै विवेकले बललाई डि–बक्स् एरिया बाहिरै बाट गोल पोष्टको दिशा दिएका थिए ।

१–० ले पछि परेको बागमती सम्हालिन नपाउँदै वीरगञ्जका कृपा चौधरीले अग्रता दोब्बर पारेका थिए । खेलको ५६ औं मिनेंटमा विवेक चौधरीको क्रस बललाई कृपाले गोलमा परिणत गरे । खेल अवधि भर नैं विवेक र कृपाको तालमेल उत्कृष्ट देखिएको थियो ।
खेलको ८४ औं मिनेंटमा विवेकले व्यक्तिगत दोश्रो गोल गर्दै वीरगञ्जलाई ३–० को फराकिलो अग्रता दिलाए । कृपा चौधरीले पेनाल्टी एरियाबाट दिएको व्याक पासलाई विवेकले डि–बक्स् एरिया बाहिरैबाट गोलमा परिणत गरेका थिए ।
बी डिभीजन क्लब बीरगञ्ज सामु निरहि देखिएको बागमतीले खेलमा सम्झन लायक अवसर बनाउन सकेन । यद्यपी बागमतीका गोल रक्षक प्रम्जय गच्छदारले भने वीरगञ्जका उत्कृष्ट प्रहार बचाउ गरेका थिए ।
खेलको आठौं मिनेंटमा कृपा चौधरीको उत्कृष्ट प्रहार वागमतीका गोल रक्षकले विफल पारेका थिए । २६ औं मिनेंटमा विवेक चौधरीले वन भर्सेस वनको अवसर गुमाए । कृपाको क्रसमा विवेक सम्हालिन नसक्दा वागमतीका गोल रक्षक गच्छदारले उत्कृष्ट बचाउ गरेका थिए ।
खेलको ३४ औं मिनेंटमा कृपा चौधरीको प्रहार वागमतीका आफ्रिकी डिफेण्डर मौसाले गोल लाइनबाट क्लिएर गरेका थिए । किपर समेत विट भइसकेको अवस्थामा वीरगञ्जका कृपाको प्रहार विफल भयो । त्यस लगतै खेलको ३८ औं मिनेंटमा सागर चौधरीको क्रसमा विवेक चौधरी डिबक्स भित्रबाट गरेको सशक्त प्रहार वागमतीका गोल रक्षकले विफल पारेका थिए ।

वीरगञ्जको जितमा दुई गोल गरेका विवेक चौधरी खेलको म्यान अफ दिम्याच घोषित भए । उनले १० हजार नगद र ट्रफि हात पारे । प्रतियोगिता अन्तर्गत पहिलो क्वाटर फाइनल खेलमा शनिबार केविए ग्लोबल भरतपुर फुटबल क्लब र मकवानपुर ११ विच प्रतिष्पर्धा हुँने आयोजकले जनाएको छ । भरतपुरले उद्घाटन खेलमा आयोजकलाई पराजित गर्दै क्वाटर फाइनलमा स्थान बनाएको हो ।

वीरगन्जका डिफेन्डर संजय चौधरीले निकालेको लामो पासलाई सदुपयोग गर्दै विवेकले टिमको जित सहज बनाएका थिए । प्रतियोगितामा बिजयी सुरुवात गरेको वीरगन्जले आइतवार साविक बिजेता न्युरोड टिम एनआरटीसंग प्रतिस्पर्धा गर्नेछ । यता खेलमा राम्रो सुरुवात गरेपनि स्कोर निकाल्न नसकेको बागमती भने पराजय भोग्दै प्रतियोगिताबाट बाहिरिएको छ ।

खेलमा दुई गोल गरेका विवेक खेलको म्यान अफ दि म्याच घोषित भए । उनले महालक्ष्मी बिकास बैंकद्धारा प्रायोजित १० हजार राशीको म्यान अफ दि म्याच पुरस्कार प्राप्त गरे ।

प्रतियोगिता अन्तर्गत शनिवार भरतपुर फूटबल क्लब र मकवानपुर ११ बीच खेल हुनेछ । आयोजक नव जनजागृति युवा क्लबलाई पराजित गर्दै चितवनले मकवानपुर ११ संगको भेट पक्का गरेको हो ।

जीतपुरसिमरा उपमहानगरपालिकाको मुख्य सहयोग र जगदम्बा स्टील्स् प्रालिको मुख्य प्रायोजनमा बिहिवारदेखि सुरु भएको प्रतियोगितामा ए डिभिजनका पाँचसहित १० टिमको सहभागिता रहेको छ । प्रतियोगिताको विजेताले १० लाख र उपविजेताले पाँच लाख प्राप्त गर्नेछ ।