जीतपुरसिमरा उपमहानगरपालिका वडा नम्बर १६ टाँगियाबस्तिमा बाघले आक्रमण गरेर एकै घरका १० वटा बाख्रा मारेको छ ।

स्थानीय धनबहादुर थिङ्गले जंगलमा चराउन लगेको बाख्रा घर फर्किने क्रममा बाघले सोमवार राति आक्रमण गरेर मारेको हो । चरिचरनको लागि जंगलमा लगेको बाख्रा घर फर्किने क्रममा बाघले मारेको छिमेकी रमेश सापकोटाले बताउनुभयो । उहाँले १० वटा मध्ये एउटा बाख्रा खाएको र अन्यलाई मारेर छोडेको जानकारी दिनुभयो ।

जंगलमा चराएर साझ घर फर्किने क्रममा गाउँ नजिकैको जंगलमा बाघले बाख्रा मारेको हो । ‘घर नजिकै आइपुग्न लागेपछि थिङ्ग बाख्रा जंगलमै छोडेर घर आएका रहेछन, सापकोटाले भन्नुभयो, त्यहिबेला बाघले आक्रमण गरेर बाख्रा मारेछ ।’ बाख्राको बथान राती घर नर्फिएपछि हिजो बिहान छिमेकीहरु मिलेर खोजी गर्ने क्रममा बस्तिबाट करिव ५ सय मिटर पूर्वोत्तरको जंगलमा बाख्राहरु मरेको अवस्थामा फेला पारिएको सापकोटाले जानकारी दिनुभयो । बाख्रापालन व्यवसाय गर्दैआउनुभएका थिङ्गले प्रायजसो घर नजिकै आइपुगेपछि जंगलमै बाख्रा छोडेर घर फर्किने गरेको सापकोटाको भनाइ छ । ‘चर्दै आफै आउछन भनेर अघिअघि घर फर्किनुभएको रहेछ, उहाँले भन्नुभयो, तर यस पटक बाघले मारेर एउटा बाख्रा पनि घर फर्किन पाएनन ।’

बाघले गोठ नै सखाप पारेर बाख्रा मारेपछि थिङ्गको परिवारको बिल्लिबाठ भएको सापकोटाको भनाइ छ । ‘बाख्रा पालेर परिवारको गुजारा गर्दैआउनुभएको थियो, सापकोटाले भन्नुभयो, थिङ्ग परिवारमा अब कसरी गुजारा चलाउने भन्ने समस्या आइलागेको छ ।’ स्थानीयबासिन्दाले भने थिङ्ग परिवारलाई जीतपुरसिमरा उपमहानगरपालिकाले क्षतिपूर्तिको प्रबन्ध मिलाउनुपर्ने माग गरेका छन ।