प्रहरीले निजगढका एकजना सहित प्रतिबन्धित लागूऔषधसहित चार जनालाई नियन्त्रणमा लिएको छ ।

प्रहरीले उनीहरूलाई छुट्टाछुट्टै स्थानबाट नियन्त्रणमा लिइएको जनाएको छ । जिल्ला प्रहरी कार्यालय बाराका अनुसार इलाका प्रहरी कार्यालय सिमराको टोलीले जीतपुरसिमरा उपमहानगरपालिका– ३ बजनीबाट प्रदेश २–०३–०१६ प ०८८८ नम्बरको मोटरसाइकलका चालक कलैया उपमहानगरपालिका– १ का ४३ वर्षीय शङ्कर प्रसाद यादव र त्यसमा सवार २४ वर्षीय मनिषकुमार साहलाई आठ सय ९९ पिस लागूऔषधसहित पक्राउ गरेको हो ।

प्रहरीले उनीहरूको साथबाट फेनरागन २९६ पिस, डाईजेपाम ३०३ पिस र नोर्फिन ३०० पिस बरामद गरेको बारा प्रहरीका प्रवक्ता एवम् प्रहरी नायव उपरीक्षक (डिएसपी) दधिराम न्यौपानेले जानकारी दिनुभयो । त्यस्तै इलाका प्रहरी कार्यालय निजगढले निजगढ नगरपालिका– ९ सहिद चोकबाट एक सय ८० पिस ट्रमालिन ट्याब्लेटसहित निजगढ– ८ बुद्ध चोकका २० वर्षीय विवेक मोक्तान र जीतपुरसिमरा– १६ टांगियावस्तीका २० वर्षीय सागर तामाङलाई पक्राउ गरेको छ ।

पक्राउ परेका चारै जनालाई नियन्त्रणमा राखेर आवश्यक कारबाही अगाडि बढाइएको डिएसपी न्यौपानेले बताउनुभयो ।