इलाका प्रहरी कार्यालय निजगढले शुक्रबार निजगढ नगरपालिका वडा नम्बर १३ को डम्बरपुर क्षेत्रमा लगाइएको अबैध लागुऔषध गाँजा फडानी गरेको छ ।

ईलाका प्रहरी कार्यलय निजगढका प्रहरी निरीक्षक घनश्याम श्रेष्ठको नेतृत्वमा गएको टोलीले हिजो दिउसो डम्बरपुरको चुरे क्षेत्रको जंगल आसपास ७ कठ्ठामा लगाइएको गाँजा फडानी गरेर नष्ट पारेको हो । प्रहरीले केही दिन यता निजगढ १२ को कुलिया र १३ को भक्तलाल र डम्बरपुर क्षेत्रमा गाँजा फडानी कार्यलाई तीव्र पार्दैआएको छ ।

त्यसैगरी प्रहरीले सिम्रौनगढ नगरपालिकाको खजानीबाट हिजो नै १० कठ्ठा क्षेत्रको गाँजा फडानी गरेको जिल्ला प्रहरी कार्यालय कलैयाले जानकारी दिएको छ । जिल्ला प्रहरी कार्यालयका प्रवक्ता एवंम प्रहरी नायव उपरीक्षक दधिराम न्यौपानेका अनुसार निजगढ र सिम्रौनगढमा गरि प्रहरीले १७ कठ्ठा क्षेत्रमा करिव १५ हजार गाँजाको बोट काटेर नष्ट पारेको हो ।