बारामा तेल ट्यांकरमा मोटरसाइकलले ठक्कर दिँदा मोटरसाइकल चालक प्रहरी जवानको मृत्यु भएको छ ।

बाराको जितपुर सिमरा उपमहानगरपालिकामा तेल ट्यांकरलाई मोटरसाइकलले ठक्कर दिँदा जिल्ला प्रहरी कार्यालय पर्सामा कार्यरत प्रहरी जवान २९ वर्षीय दिनेश परियारको मृत्यु भएको हो ।

सोमबार राति १० बजेर ४० मिनेटको समयमा परियार चढेको ग १४ प ५९७२ नम्बरको मोटरसाइकल पथलैयाबाट बिरगंज जाँदै गरेको ना ७ ख ३०२६ नम्बरको ट्याङ्करलाई मोटरसाइकलले जितपुर सिमरा उपमहानगरपालिका–२ नेपाल टेलिकम नजिक पछाडिबाट ठक्कर दिएको थियो ।

उनको उपचारको क्रममा परवानीपुरस्थित एल.एस.न्युरो हस्पिटलमा राति १ बजेर २२ मिनेटमा मृत्यु भएको जिल्ला ट्राफिक कार्यालय बाराका प्रमुख रामकुमार महत्तोले बताएका छन ।