बारा प्रहरीले विष्फोटक पदार्थ पटाकासहित तीन जनालाई पक्राउ गरेको छ ।

प्रहरीले मकवानपुर हेटौडा उपमहानगरपालिका वडा नम्बर- १५ बस्ने ३४ वर्षीय बुद्ध लोप्चन, ३२ वर्षीय राजकुमार लोप्चन र २५ वर्षीय बुद्ध लोप्चनलाई हिजो पक्राउ गरेको हो । सिमा प्रहरी चौकी छतवा बाराबाट मंगलबार राति खटिएको प्रहरी टोलीले फेटा गाउँपालिका वडा नम्बर- ३ बाट उनीहरुलाई पटाका सहित पक्राउ गरेको थियो ।

भारतबाट शंकास्पद रुपमा ना ३८ प ७९५३ र ना १६ प ६२२९ मोटरसाइकलमा तीन जना नेपालतर्फ आइरहेका थिए । रोकेर चेकजाँच गर्दा उनीहरुको साथबाट कार्टुनमा राखी लुकाएर ल्याएको पटाका बरामद भएको जिल्ला प्रहरी कार्यालय बाराका प्रवक्ता प्रहरी नायब उपरीक्षक गौतम मिश्रले जानकारी दिनुभयो । उनीहरुको साथबाट किङ कोबरा-११ बण्डल र ईलेक्ट्रिक स्पार्कर्स-५० प्याकेट बरामद भएको उहाँको भनाइ छ ।

बारा जिल्ला अदालतबाट विष्फोटक पदार्थ अन्तर्गत कसूरमा पहिलो पटक ५ दिनको म्याद लिइ थप अनुसन्धान भइरहेको प्रहरीले जनाएको छ ।