निजगढ ६ स्थित बागदेव दुग्ध उत्पादक सहकारी संस्थाको उपाध्यक्ष पदमा टुकबहादुर तिमल्सिना विजयी हुनुभएको छ ।

हिजो भएको मतदानमा तिमल्सिना अर्का प्रत्याशी उदयराज पाण्डेलाई पराजित गर्दै विजयी हुनुभएको हो । निर्वाचन समितिका अधिकृत अजय उप्रेतीले दिएको जानकारी अनुसार उपाध्यक्ष पदका उम्मेदवार तिमल्सिनाले ६ सय २७ मत प्राप्त गर्नुभएको थियो भने अर्का उम्मेदवार पाण्डेले २ सय ९१ मत पाउनुभएको थियो । कुल २ हजार २ सय ७० जना मतदाता रहेको सहकारीको मतदानमा ९ सय ३९ जनाले मतदान गरेका थिए । निर्वाचनमा ७ मत बदर भएको निर्वाचन समितिले जानकारी दिएको छ ।

नयाँ संचालक समितिको अध्यक्ष पदमा थानेश्वर सापकोटा अविरल सहित अन्य पदाधिकारी र सदस्यहरु यसअघि नै निर्विरोध चयन भएका थिए । उपाध्यक्ष पदमा भने सहमति हुन नसकेपछि मतदान भएको हो । निर्वाचन अधिकृत उप्रेतीले विजयी उम्मेदवारहरुको लागि आज बिहान सपथग्रहण गराएर प्रमाण पत्र वितरण गर्ने कार्यक्रम भएको जानकारी दिनुभएको छ ।